Serbske ludowe zastupnistwo
Sorbische/wendische Volksvertretung
Sorbian/Wendish People’s Representation

Zasady

Iniciatiwa Serbski sejm je so zhromadnje z ćłonami RS na slědowace dypki/nadawki dojednała:

  1. RS njeje rada iniciatiwy, ale rada cyłeho ‘serbskeho luda’ (hl. kulojte blido we přewrótowym času!).
  2. RS ‘je njewotwisny gremij", t.r. njewotwisny tež wot iniciatiwy (zo tomu tak je, naspomnju jenož mjenje bóle připódla - na zhromadźiznje w Njebjelčiach su tam wobdźěleni sobustawojo iniciatiwy rumnosć wopušćuli, jako so wažne dypki diskutowachu, kaž na př. prašenje, kak so předsyd(ź)a RS nastaja resp. wola. A woni su so (bjez nas!) dojednali, zo woni to po Wojerowskim zeńdźenju sami postaja)
  3. RS zastupuje napřećo zjawnosći chutnosć a transparencu ideje Serbskeho sejma,
  4. RS wólbny proces jako njewotwisny organ kritisce wobkedźbuje a interweněruje, je-li je dźěło iniciatiwy njetransparentne,
  5. dokelž njejsu kandidaća RS přez cyły serbski lud wolene, su tak spěšnje kaž móžno wólby trěbne, a wone dyrbja so w blišim času přihotować a přewjesć,
  6. dokelž je realna situacija tajka kajkaž je, dyrbi so jara transparentnje postupować, t.r. legitimacija přińdźe jenož přez wotewrjenosću a transparencu.

Wšitke tute zasady njejsu potajkim někajki konserwatiwny nadawk, na př. tradicije a nałožki pěstować a zakitować, ale to su inowatiwne nadawki, mjenujcy do přichoda myslić a jednać a proces k Serbskemu sejmej kritisce přewodźeć.

Na kóncu hišće małke přispomnjenja: Wšo štož je so tu prajiło, njeje a njemóže być dorozrisane. Kajke definitiwne zaměry, nadawki abo statut RS změje, so do załoženja RS wot nas postajić njemóže. RS dyrbi to sama rozsudźić a wobzamknyć. W protokolu zetkanja z RS mjenujcy steji, "zo dyrbi so RS sama do swojeje funkcije namakać jako ‘njewotwisny’ gremij, kotryž wolu serbskeho ludu abo zhromadźenstwa Serbow" - při wšěch dotalnje hišće eksistowacych njedostatkach - reprezentuje.

Ćłony RS pak tomu přihłosowachu, zo bě prawje, zo je iniciatiwa organizowanje a powołanje RS iniciěrowała, zo by so etablěrowanje Serbskeho sejma skónčnje zahajiło a tež, zo by tutón proces lěpje legitimowany był. A zhromadnje smy potom termin za dźensa namakali, zo ma so RS tu we Wojerecach přez iniciatiwu powołać abo intronizować.

A hišće něšto bytostneho. W Njebjelčicach smy tež wo tym rěčeli, zo njeměł Serbski sejm kopija zwučenych němskich parlamentow z konkurowacymi frakcijemi być, ale skerje gremij, kotryž reprezentuje zhromadźenstwo Serbow a jedna k dobremu tutoho zhromadźenstwa. To ma so wosebiće přez bazowo-demokratiske principy docpěć, kotrež k lěpšemu konsensej mjez Serbami wjedu. Žadanje potajkim bě, zo njezałožimy parlament kaž kóždy druhi, po němskim mustrje jenož parlamentariskeje demokratije, ale zo załožimy parlament, kotryž tež najćišiši hłós słyši, t.r. parlament bazoweje demokratije, kotryž parlamentarisku a bazowu demokratiju zwjaza. Jara wažne při wšěm bě, zo hodźi so na přikładźe małeho luda bazowa demokratija demonstrować.